زوامل عجايب عجيبة تفطر القلب والكبد

ياشرعية كيف اقنعش تقتنعي
من قبل توقيف القطار الماشي

ياكم وكم عبرت لش عن وضعي
وضيق عيشي وانقطاع معاشي

ولا سمعتي لي ولن تستمعي
مادام فيش المرتشي والواشي

سلمتي الدولة لكمن خضعي
واتعينوا قادات واحنا ماشي

ضحيت من أجلش وضحوا ربعي
ولازلت في عين اخوتش دحباشي

ذي يحسبون الانقلابي شرعي
وكل شرعي عندهم عفاشي

يستاهل المغرور ياكل برعي
ذي يأمن الخداع والغشاشي

#الشاعر_مجلي_القبيسي

// عجايب عجيبة تفطر القلب والكبد //

صفوني على واحد يحب الوطن بجد
ويحسب حسابه قبل يحسب مكاسبه

وطن طاح كم نحصي جراحه وكم نعد
وزادت إصاباته وكثرت مصايبه

فهذا مع هذا وهذا مع وضد
وكلا" على الثاني يوجه كتايبه

وكلا" على كيفه يحلل وينتقد
وكلا" يخبر بالخبر ذي يناسبه

متى صيّح الظالم نجيبه ونستعد
وذا صيّح المظلوم ماحد يجاوبه

وصرنا وصاروا بين فاقد ومفتقد
وصار الزمن يشكي خيانة نوايبه

فكم قايدٍ خان الوطن لاجل يستبد
وكم صاحبٍ لاجل البيس باع صاحبه

خسرنا جميعا" حسب ما اظن واعتقد
وحتى عيون الشعب خسرت حواجبه

جميع العوالم بعدما تختلف تسد
وحنّا ولا حاجة سديدة وصايبة

قده حظ هذا الشعب من يوم ماولد
ولا قد لقي حاكم يحقق مطالبه

دخل حرب ما ودّه ولا هو لها مود
وجاء من تحكم في معاشه وراتبه

طعن وحدته ذي شجعه أمس يتحد
وخان المواطن ذي وقف أمس جانبه

وذي قال بايبني ويعمر وصل يهد
وطلعت وعوده والشعارات كاذبة

وابو عينها لازال يمهد ويمتهد
وهذا المعارك كلها من سبايبه

خسرنا الوطن من اجل ظالم ومستبد
وجيش انتهى من اجل توريث اقاربه

وقاتل مع قاتل يجاهد ويجتهد
وذي ما يأيد حربهم با يحاربه

ضروري يكون الشعب خايف ومرتعد
ومن خالف اهل السوء ساءت عواقبه

كما ليس من حقك تدافع ولاترد
ولا للمشنب حق يمسح شواربه

عجايب عجيبة تفطر القلب والكبد
وفرخ العجب زادت وكثرت عجايبة

على من نثق في الشعب هذا ونعتمد
من الحاكم المسؤل ذي بانعاتبه

لمه هكذا عن بعضنا البعض نبتعد
وليش المشاكل والفتن والمضاربة

نبا حكم شورى مانبا حكم منفرد
ودستور من خالف بنوده نحاسبه

وصندوق به نختار قاداتنا الجدد
وعبره نغير (عبد ربه) و (نايبه)

فلا الشيخ والعمدة ولا ذي سكن عمد
يشرعن لهولاء الخاينين المقالبة

والا سيبقى عيشنا هكذا نكد
إذا لم يقم كلين منا بواجبه

وما يربح الا من على الله يعتمد
وذي مايخاف الله يلقى شوايبه

صلاتي على احمد صل يامستمع وعد
عدد ما نزل سبل المطر من سحايبه

#الشاعر_مجلي_القبيسي

مشاركتي في المرحلة الأخيرة من مسابقة حجّاج للشعر الشعبي :

ياربّ في باب عدلك شاعِر الشُّعّار .
واقف ونفسه من الأعماق مكسوره .

يطرُق بكفّ الرّجا في عتمة الأسحار .
يحمِل قضيّه بدمّ العين مسطوره .

واثق بعدلك وعلمك يشرح اللي صار
بابيات في صفحة التاريخ محفوره

يقول : أهوين عدّ الوابل المدرار.
على بلاد اسلمت للذلّ مجبوره

ما دام قد ضيّع الحق اهله القُصّار .
والناس تنفر من الثوّار والثوره .

باترافعَ اليوم بسم الموطن المنهار .
والشعب اذي كل غصّه فيه مقبوره .

عاصِبْ على بطنيَ الخاويْ ثلاث احجار
ومن قال : لي كيف حالك؟! قلت : مستوره .

بردان خايف مشرّد مُضطهد محتار .
حتى لساني إذا عارضت مبتوره

يا ليت من ثار من أجل الوطن ما ثار .
دامَ اسقط الأصل واتحالف معَ الصوره .

ضعنا وضاعت بلدنا لاجل خمسه انفار .
ما هو لأجل ( الخميني ) أو ( أخو نورَه )

فِيران يا سدّ مأرب ما عدوشي فار .
قد كل واحد شحَذ نابَيْهْ َواضفورَه

ناشدتكَ الله لا تضعف ولا تنهار
فيكَ المُنى بعد رب العرش مقصوره .

يا كل صادق مرابط في خطوط النار .
غيرك يُسمّى إذا استشهدت أسطوره .

غيرك جميع اهتمامه بابنه الطيّار
واخوه تاجر ذهب والأخت دكتوره

قالوا لنا الحرب ضد الكفر والكفار
واحنا الضحيّة لحرب احقاد مسعوره

عن حالنا كل واحد ملتهي في بار
في مقعد الريش أو في حضن مخموره

خزْناتهم ف البنوكَ امتار في أمتار .
وكم يا أُسَرْ تحت خط الفقر مطمورَهْ

هم يحلموا بالفلل أو راحة الأسفار .
واحلامنا في رغيف الخبز محصوره .

والبعض مشغول بالتطبيل والزِّمّار .
لاجل السّرَق با يسوي كل محظوره .

أبواق تضليل للتحريض بالإيجار
مثل البنادق هناك افواه مأجوره

ذا حالنا من يَدَي سمسار لا سمسار .
مثل الورق لا وقع في وسط جعفوره .

هذا ادِّعائي أمام الواحد القهّار .
ما خاب من جا لبابه طالب الجورَه .

ياربّ في باب عدلك شاعِر الشُّعّار .
واقف ونفسه من الأعماق مكسوره .

هيثم.الرصاص.tt
16-2-2017 م .